Información proporcionada polo Concello de A Coruña:
O Concello da Coruña aprobou os servizos mínimos que rexerán no transporte colectivo urbano de viaxeiros durante a folga xeral convocada para este mércores 11 de novembro, unha xornada de paro de 24 horas que afectará ao servizo prestado pola Compañía de Tranvías.
O Goberno municipal considera que o transporte público urbano é un servizo esencial para a comunidade, dado que garante o acceso da cidadanía a centros de traballo, educativos e sanitarios, así como a libre circulación pola cidade. Por este motivo, estableceuse unha prestación mínima que compatibiliza o dereito constitucional á folga co mantemento dun servizo básico para a veciñanza.
A resolución municipal fixa finalmente uns servizos mínimos equivalentes ao 53,93% da oferta habitual, con 48 autobuses en circulación dun total de 89 vehículos, unha porcentaxe intermedia entre a proposta da empresa concesionaria, que solicitaba 53 autobuses (59,55%), e a presentada polo comité de empresa, que propoñía 44 autobuses (49,44%). A proposta aprobada polo Concello buscou un equilibrio entre ambas posicións, priorizando especialmente as conexións cos centros sanitarios e os desprazamentos esenciais da cidadanía durante a xornada de folga.
Entre as liñas con maior dotación de servizos mínimos figuran as liñas 6-6A, con catro vehículos; a UDC, tamén con catro; e as liñas 4, 5, 7, 11, 12, 12A, 14 e 20, con tres autobuses cada unha. A liña UDC 2 (San Pedro de Mezonzo-Zapateira-UDC) non prestará servizo durante a xornada de folga.
O decreto tamén establece que a Compañía de Tranvías será a responsable da organización dos servizos mínimos e da designación do persoal necesario para a súa prestación, coa participación do comité de folga. Ademais, a concesionaria deberá informar ao Concello das incidencias que poidan producirse ao longo da xornada.
Servizos mínimos por liñas
- Liña 1: 2 autobuses.
- Liña 1A: 2 autobuses.
- Liña 2-2A: 2 autobuses.
- Liña 3-3A: 2 autobuses.
- Liña 4: 3 autobuses.
- Liña 5: 3 autobuses.
- Liña 6-6A: 4 autobuses.
- Liña 7: 3 autobuses.
- Liña 11: 3 autobuses.
- Liña 12: 3 autobuses.
- Liña 12A: 3 Autobuses.
- Liña 14: 3 autobuses.
- Liña 17: 2 autobuses.
- Liña 20: 3 autobuses.
- Liña 21: 2 autobuses.
- Liña 22: 2 autobuses.
- Liña 23-23A: 1 autobús.
- Liña 24: 1 autobús.
- Liña UDC: 4 autobuses.
- Liña UDC 2: Sen servizo.
- Total: 48 autobuses (53,93%).
