A partir do 1 de agosto, activaremos un dispositivo especial de reforzos con motivo das Festas de Maria Pita 2026. O obxectivo é favorecer o uso do transporte público durante a celebración dos principais concertos e espectáculos que se celebrarán na Praza de María Pita os días 1, 2, 3, 4, 5, 6, 9, 10, 11, 12, 13, 15 e 16 de agosto. O servizo cubrirá todas as actuacións que se celebren na praza durante a primeira quincena de agosto, incluíndo o programa Noites de María Pita e os concertos da praza do Festival Noroeste Estrella Galicia.
Este dispositivo, con saídas centralizadas desde Porta Real, estará habilitado a partir das 00.00 horas. As liñas que contarán con reforzo do servizo serán a 1, cara a Palloza, A Gaiteira, Os Castros, O Castrillón e Monelos; a 1A, con destino a Catro Camiños, Salvador de Madariaga, Matogrande e Eirís; a 3, cara a Durmideiras e Monte Alto; a 3A, con percorrido ata Labañou e Os Rosales; a 6, cara á avenida de Fisterra, O Ventorrillo e Meicende; a 7, con servizo ao Peruleiro, O Ventorrillo e Vila de Negreira; a 11, con paso por Juan Flórez, Os Mallos e Pla y Cancela; a 21, cara a O Birloque e Novo Mesoiro; e a 24, con destino a Elviña e A Zapateira.
Ademais, durante todas as noites das festas seguirá funcionando o servizo nocturno de autobús. En sentido inverso, as saídas desde Porta Real comezarán ás 00.05 horas con percorrido por Os Castros, O Castrillón, Monelos, Eirís, Palavea e a rolda de Outeiro. No sentido habitual, o servizo partirá ás 00.30 horas desde Labañou con destino á rolda de Outeiro, O Birloque e Novo Mesoiro.
